د شمال بلخ ولایت په مرکز مزارشريف ښار کې د چهارشنبې پر ورځ د «۱۴۰۰ کال د لېندۍ پر ۱۷ مه» معلولينو سره د دولتي او غير دولتي ادارو او بنسټونو د مرستو همغږي کېدو او له دغو مرستو څد سمې ګټې اخيستنې لپاره پروګرام جوړ شوی دی.
معلولوین وايي، غوښتنه یې دا ده،چې حکومت او مرستندویه بنسټونه دې د جنګي او طبيعي معلولينو تر منځ توپير نه کوي او ټولو سره دې يو شان مرسته وکړي.
په ورته وخت کېدوی وايي، تر ډېره طبيعي معلولين له پامه غورځول شوي دي.
د معلولينو د پياوړي کېدو سازمان مسوول تاج محمد مرادي وايي:« هغه معلولين چې جنګي دي پيسې ورکول کېږي او هغه معلولين چې طبيعي دي،مرسته ورسره نه کېږي. له اوسني حکومته غوښتنه کوو،چې د معلولينو تر منځ توپير دې له منځه يوسي او ټولو ته دې پر يوه سترګه وکتل شي.»
د نه اورېدونکو معلولينو د ټولنې مسوول انيل اکبري وايي:« د تعليم، اقتصاد، ټولنيزو چارو او کارموندنې برخه کې ډېرې ستونزې لرو. متاسفانه زموږ ډېرو معلولينو ته د تحصيل زمينه برابره نه ده او زموږ غوښتنه دا ده،چې دې برخې ته پاملرنه وشي.»
له دې سره شمال زون کې د سويډن مرستندویه کمېټې مسوول نجیب الله یزدان پناه وايي، خيريه بنسټونه بايد د معلولينو لاسنيوی وکړي.
یزدان پناه زياته کړه،چې د معلولينو تر منځ هر ډول توپير ناسم او د اندېښنې وړ دی.
یزدان پناه وايي:«د معلول تر کليمې لاندې ټول شامل کېږي،هغه که عوامل يې هر شی وي، نو ځکه د دوی تر منځ توپير کول يوه جدي ستونزه ده. زه هېله من يم،چې اوسنی حکومت دغې ستونزې ته پام وکړي او ياده بې عدالتي له منځه يوسي.»
اخوا بلخ کې د کار او ټولنيزو چارو، شهيدانو او معلولينو رياست د کار آمر عبدالغفور حقاني هم د معلولينو د پياوړي کېدو او هغوی ته د شغل پيدا کېدو برخه کې د خپلو هڅو يادونه کوي.
حقاني زیاته کړه:« موږ کولی شو،چې له معلولینو سره مرسته وکړو، د بېلګې په ډول هغه کسان،چې خبرې نه شي کولی او يا غږ نه اوري، اشاروي ژبه ورزده کړو. زموږ هڅه به دا وي،چې معلولينو سره کار وکړو،تر څو هغوی خپل ځانونه د ټولنې له نورو وګړو کم ونه ګڼي.»
