په افغانستان کې د ملګرو ملتونو د بشري مرستو د همغږۍ دفتر یا اوچا مسوول رامز الکبروف له شمشاد سره په یوه ځانګړې مرکه کې افغانستان دا مهال تر ټولو سخت بشري ناورین سره مخ بللی او اټکل کوي،چې ښایي د دې ناورین د مهار لپاره تر ۴ میلیارده ډالرو ته اړتیا وي.
الکبروف وايي، دلته د بشري ناورین ستونزه تازه نه ده،بلکې د اقتصادي ودې لپاره له پخوا کار نه دی شوی او پر افغانستان تازه بندیزونو دا ناورین لا پسې پړسولی دی.
الکبروف زیاتوي:« لومړی به دا ووایم،چې افغانستان له تېرو څو لسیزو راپدیخوا پرمختګ نه دی کړی. دلته کار نه دی شوی،چې اقتصادي وده رامنځته شي او د افغانستان کلیوالې سیمې پرمختګ وکړي. دلته جنګونه وو او په هېواد کې جګړې روانې وې او له دې مهم دا چې دا څلورم کال دی،چې موږ په افغانستان کې له وچکالی کړیږو.»
الکبروف د دې پوښتنې په ځواب کې چې آیا د کنګل شوې پانګې بېرته ازادول به بشري ستونزه حل کړي او که نه وویل، دا پیسې د اقتصادي څرخ په حرکت راوستلو کې مرسته کولی شي،خو په وینا یې دا د ستونزې یوازنی حل نه شی کیدای.
هغه وايي:« البته چې د نغدو پیسو شتون له اقتصاد سره مرسته کوي،خو دا یوازنی ستونزه نه ده،چې باید حل شي. له دې نور لوی مسایل شته دی،چې باید حل ورته پیدا شي. لومړی دا چې افغانستان د منابعو د مدیریت لپاره باید یو سالم سیسټم ولري او دلته باید یوه سالمه پروسه و اوسي.»
الکبروف همداراز وویل، بشري مرستې هېڅکله بشري ناورین نه شي حل کولی او په وینا یې دلته باید د خصوصي سکتور او بزګرانو ملاتړ وشي،تر څو خلک په خپله ډوډوۍ او د پیسو ګټلو منابع پیدا کړي.
هغه وایي،دا چې د افغانستان روان بشري ناورین به تر کومه روان وي، اټکل نه شي کولی، خو ډاډ یې ورکړ،چې ملګري ملتونه د افغانانو ملاتړ او مرستو ته دوام ورکوي.
