د سیاسي چارو یو شمېر تحلیل کوونکي وايي، د اسلامي امارت هغه پرېکړه،چې حکومت کې پخوانیو سیاسیونو ته ځای ورکوي، د ښې حکومتولۍ او د نړیوالو پلمو ختمولو لپاره ترې هرکلی کوي.
دوی وايي،اسلاميامارت دې هغو کسانو ته مسوولیتونه وسپاري،چې ملي ګټو ته ژمن وي او له هېواده نه دي وتلي او دوی به وکولای شي،چې اسلامي امارت سره د حکومت جوړولو کې مرسته وکړي.
تحلیل کوونکی سید اسحاق ګیلاني وايي:« هغه سیاسیون چي دلته پاتي دي، دنده دي ورکړل شي.هغه کسان چي هېواد کي پاتې نه دي، هغه بله خبره ده هغه کسان په دنده وګومارل شي،ځکه کولای شي د اسلامي امارت د جوړولو په برخه کي همکاري وکړي.»
تحلیل کوونکي وايي، حکومت کې پخوانیو چارواکو او سیاسیونو ته ونډه ورکول به د نړیوالو هغه غوښتنې او اندېښنې هم ځواب کړي،چې د ټول شموله حکومت برخه کې یې لري.
تحلیل کوونکی زمان ګل دهاتي وايي:« تر دې مهاله خو د نړیوالو غوښتنو ته د کابینې د جوړولو په برخه کي ځواب نه دی ویل شوی،هرڅه سرپرست دي او سرپرست نظام باید ختم شي.»
اسلامي امارت ویلي،ټولو هغو سیاسیونو او پخوانیو چارواکو ته په حکومت کي ځای ورکوي،چې جګړه او فساد کې ښکېل نه وو او ملي ګټو ته ژمن دي.
اسلامي امارت پر نړیوالو غږ کړی دی،چې حکومت جوړونه د افغاانو کار دی او هڅه دې نه کوي،چې د افغانستان کورنیو چارو کې لاسوهنه وکړي.
