Skip to content
د زعفرانو د کښت ملي ټولنې ويلي، روان کال د وچکالۍ له امله د زعفرانو په حاصلاتو کې ۶۰ سلنه کموالی راغلی، خو بیې یې لوړې شوي دي.
د دې ټولنې مسوولینو ویلي، سږ کال تر دې دمه زعفرانو ۱۰ ټنه حاصل ورکړی، خو تېر کال يې حاصل ۲۲ ټنه وو.
د زعفرانو کاروباریان وایي، د حاصل کمښت د دې لامل شوی، چې په هېواد کې د زعفرانو بیې لوړې شي.
دوی ویلي، بهر ته د پروازونو د نه موجودیت له امله نه شي کولای بهرنیو سوداګرو ته د افغانستان زعفران ورسوي.
امریکا د افغانستان د زعفرانو د پلور له عمده بازارونو ګڼل کېږي، خو د دې ترڅنګ، اسټرالیا، سویس، هند او ترکیه نور هغه هېوادونه دي، چې د افغانستان زعفران په کې پېرېدونکي لري.
