Skip to content
سعودي عربستان ويلي، تمه لري،چې دا ځانګړې ناسته به پر کلیدي اصولو د ګډ دریځ د غوره کولو لپاره فرصت برابر کړي.
سعودي دغه راز ویلي، دا ناسته به د بهرنیو له لاسوهنې پرته افغانستان کې د یووالي، ځمکنۍ بشپړتیا، ملي حاکمیت، ثبات او امنیت برخه کې مهم ګامونه پورته کړي.
سعودي زیاته کړې، چې افغانان په ژمي کې له ناوړه بشري وضعیت سره مخامخ دي او د خوراکي موادو،درملو او سرپناه په ګډون بېړنیو مرستو ته اړتیا لري.
یاد هېواد د اسلامي همکاریو سازمان له غړو، نړیوالو موسسو او یادې ناستې ته له وربلل شویو هېوادونو غوښتي دی،چې له افغانانو سره مرستې وکړي.
اخوا پاکستان بیا وړاندیز کړی دی، چې د اسلامي همکاریو سازمان ناسته دې په اسلام اباد کې وشي.
د بهرنیو چارو وزارت په یوه خبرپاڼه کې ویلي، دوی د راتلونکې دسمبر مېاشتې پر ۱۷مه اسلام اباد کې د دې ناستې د کوربتوب وړاندیز کړی.
د پاکستان د بهرنیو چارو وزیر شاه محمود قريشي ویلي، هېله لري،چې د اسلامي همکاریو سازمان به د دې ناستې لپاره د دوی د کوربتوب وړاندیز ومني.
قریشي هم ویلي، چې افغانان دا مهال د خوړو او درملو په ګډون بیړنیو بشري مرستو ته اړتیا لري او د یاد سازمان غړي هېوادونه باید د افغان ولس غږ واوري.
لا مالومه نه ده،چې دې ناستې ته به د اسلامي امارت استازي هم ور وبلل شي او که نه.
