په ورته مهال مزارشريف کې يو شمېر مدني فعالان هم وايي، هر افغان په هر وخت کې پاسپورټ ته د لاسرسي حق لري او غوښتنه کوي،چې حکومت بايد د پاسپورت د وېش لړۍ عادي حالت ته راوګرځوي.
غلام علي ملکزی د ام البلاد بنسټ مشر وايي:«دولت مکلف دی،چې خلکو ته اسانتياوې رامنځته کړي. دا د خلکو مشروع او اساسي حق دی،چې پاسپورټ ته لاسرسی ولري، مسوولين بايد دې ته پاملرنه وکړي چې د خلکو ستونزې حل شي.»
له دې سره بلخ کې د پاسپورت رياست مسول شیخ عزام بیا وايي، دمګړی يې د پاسپورټ د وېش محدوده لړۍ پيل کړې او زياتوي،چې کله ستونزې حل شي،نو ياده پروسه به نورمال حالت ته وګرځي.
عزام زیاته کړه:« د نويو پاسپورټونو د ورکولو او يا هم د زړو پاسپورټونو د تمديد اجازه تر اوسه پورې له مرکزه نه ده راغلې،چې هر کله زموږ تخنيکي ستونزې حل شوې او د مشرانو له خوا راته اجازه وشوه،نو بيا به خلکو ته په عادي ډول د پاسپورټونو د ورکړې پروسه پيل کړو.»
د افغانستان پاسپورټ رياست چارواکو هم ويلي،چې په نږدې ورځو کې به په دغه برخه کې نورې اسانتياوې هم رامنځته کړي.
