د ملګرو ملتونو بشري چارو د همغږۍ دفتر یا اوچا هغه ۶۰۰ میلیون ډالره مرستې پوره کړې،چې د افغانستان لپاره یې له نړیوالو غوښتې وه.
اوچا وايي، دغه غوښتنه یې عملي شوې او د یاد فنډ سل سلنه د دوی لاس ته ورغلی دی.
د اوچا خبرپاڼې یوه برخه:« موږ چې د افغانستان لپاره د څه باندې ۶۰۰ میلیونه ډالرو بشري مرستو غوښتنه کړې وه،هغه اوس سل سلنه چمتو شوې. موږ ته را رسیدلې دي. موږ غواړو،له بېلابېلو لارو دغه مرستې اړمنو افغانانو ته ورسوو.»
ملګرو ملتونو په افغانستان کې د نوي حکومت له راتګ سره سم له مرستندویو هېوادونو وغوښتل،چې افغان ولس سره باید څه باندې ۶۰۰ میلیون ډالره مرسته وشي.
اخوا د اقتصادي چارو یو شمېر کارپوهان په دې باور دي،چې دغه مرستې کولای شي، د بېوزلۍ کچې د راکمولو په برخه کې مثبت رول ولوبوي،خو د راتلونکي احتمالي بشري ناورین لپاره بسنه نه کوي.
دوی وايي، د مرستو ویش ډول باید داسې وي،چې خوراکي توکي لرې پرتو سیمو ته ورسېږي او نغدي مرستې ښارونو ته ځانګړې شي.
اقتصادي کارپوه نورالله عزیز وايي:« نغدي مرسته تر ډېره ښارونو کې او یا ښارونو ته نږدې ساحو کې په نظر کې ونیول شي،ځکه دلته بازارونه دي او د ضرورت وړ توکي په اسانۍ سره رانېول کېږي او کولای شي هغه توکي چې دوی ورته په ورځني ژوند کې ضرورت لري له بازارونو ترلاسه کړي.»
بل لور ته ځنې نور په دې اند دي،چې په هغو هېوادونو کې چې یوازې بشري مرستې شوې دي، تر ډېره بې وزله پاتې شوي دي،چې ژوندی مثال یې افریقايي هېوادونه دي،چې له لسیزو راهیسې ورسره بشري مرستې کېږي،خو په روزګار کې یې هېڅ ښه والی نه دی راغلی.
اقتصادي کارپوه اجمل سهیل وايي:« افغانستان کې د بشري مرستو پر ځای دې مستقیم او غیرمستقیم ډول پانګونه وشي، ترڅو خلک پر خپله د کار په بازار کې برخه واخلي او د کار پر مټ دوی عواید ترلاسه کړي،چې شخصي اقتصاد او بیا د افغانستان اقتصاد وده ومومي.»
دغه مرستې داسې مهال افغانستان ته د راستولو لپاره چمتو شوي دي،چې ګڼو نړیوالو بنسټونو اندیښنه څرګنده کړې ده، چې د ژمي له رارسیدو سره به د افغانستان نیمايي برخه وګړي له سخت بشري ناورین سره مخ شي او سړه هوا به میلیونونه افغانان چې له لوږې سره مخ وکړېږي.
