بغلان کې د ازادو خبريالانو ټولنې فعاليتونه بيا پيل شول

د باختر اژانس د خبر له مخې؛ په بغلان کې د افغانستان آزادو خبريالانو د ټولنې استازي محراب الدين ابراهيمي د اطلاعات او کلتور رییس ته په بغلان کې د خبريالانو او رسنيو ټولنې د فعاليتونو د څرنګوالي په اړه هر اړخيز مالومات ورکړي او د رسنيو او خبريالانو د فعاليتونو د ښه والي په موخه یې د اطلاعات او کلتور رياست د همکارۍ غوښتنه کړې ده.

د بغلان د اطلاعات او کلتور رييس مولوي اسدالله مصطفی د افغانستان د ازادو خبريالانو ټولنې د بيا پرانیستلو هرکلی کړی او ژمنه يې کړې، چې د افغانستان اسلامي امارت د پاليسۍ په چوکاټ کې به د خبريالانو او رسنيو د کاري موخو د ګړندي کولو برخه کې هر اړخيزه همکاري کوي.

مولوي اسدالله مصطفی ویلي، بغلان کې به د خبرونو پر خپرولو کې محدويتونه لرې شي، چې په خبره یې د رسنیو کار پر وړاندې خنډ پیدا کوي.

بغلان کې د افغانستان د آزادو خبريالانو د ټولنې استازولۍ شپږ کاله مخکې جوړه شوې وه.