د نومبر شلمه د ماشومانو نړیواله ورځ، چې له تېرې څه باندې یوې لسیزې یې افغانستان کې هم نمانځل دود شوي و، اوس یونیسف یا د ماشومانو ملاتړې اداره وايي، د نومبر شلمه نه نمانځي.
یادې ادارې په یوه خبرپاڼه کې ویلي، سږ کال دا ورځ افغانستان کې نه نمانځي، د افغان ماشومانو لپاره د نومبر شلمه توره ورځ ده.
د خبرپاڼې یوه برخه:« د نومبر شلمه د ماشومانو نړیواله ورځ ده، افغانستان کې د یونیسف استازولي دا ورځ نه نمانځي. موږ د راتلونکو ۲۴ ساعتونو لپاره د خپلو ټولنیزو پاڼو پروفایلونه تور او ډیجټلي فعالیتونه تړو، ترڅو وښیو، چې د افغانستان ماشومان له سخت ګواښ سره مخ دي. موږ له دې اعتراضي حرکت سره غواړو له نړۍ وغواړو، چې د افغانستان ناورین په اړه دې همدا اوس لاس په کار شي.»
افغان ماشوم له ګوډیو سره نه لوبېږي، روغتیایي ستونزې او ان لوږه هغه څه دي، چې له افغان ماشومانو یې د ژوند یو خوږ پړاو اخېستی دی.
د ماشومانو ملاتړ ادارې دا هم ویلي، له ۱۴ ملیونو زیات ماشومان په افغانستان کې کافي خوړو ته لاسرسی نه لري او نه پوهېږي، چې راتلونکی به یې څنګه کېږي؟
د نړیوالو بنستونو د خپرو شویو مالوماتو له مخې، سږ کال افغانستان کې له یو میلیون زیات ماشومان له خوارځواکۍ سره مخ دي.
دا یواځې لوږه نه ده، چې د افغان ماشومانو ژوند ګواښي، کم عمرۍ کې ودونه، درانه کارونه، د ساري ناروغیو خپرېدل او له زده کړو محرومیت نورې جدي ننګونې دي.
