ټاکل شوې ده، چې د ملګرو ملتونو سازمان نن د افغانستان په اړه غونډه جوړه کړي او د افغانستان لپاره د یاد سازمان ځانګړې استازې دیبورا لاینز به په کې د افغانستان په تړاو مالومات وړاندې کړي.
د ملګرو ملتونو سازمان دا بحث به د افغانستان پر وخت د شپې دوولس بجې پیل شي.
د راپورونو له مخې، په دې ناسته کې په افغانستان کې پر بشري حقونو او افغانانو ته د بشري مرستو پر رسېدو بحث کېږي.
د افغانستان اسلامي امارت هم د دې ناستې جوړېدو هرکلی کړی دی.
د افغانستان اسلامي امارت له لوري ملګرو ملتونو ته معرفي شوی استازی سهیل شاهین وایي، په دغه سازمان کې د افغانستان د څوکۍ تر لاسه کولو لپاره یې شرایط پوره کړي او باید په دې برخه کې د دوی غوښتنه ومنل شي.
هغه پرون ناوخته پر ټوېټرپاڼه لیکلي،چې اسلامي امارت د دوحې هوکړې ته ژمن پاتې شوی او چاته اجازه نه ورکوي،چې د افغانستان خاوره د نورو هېوادونو پر ضد وکارول شي.
