د امربالمعروف او نهی عن المنکر وزارت چارسمبالی شیخ محمد محمود وايي، هغو کسانو چې بیتالمال لوټ کړی او پر فساد کې ښکېل وو،حساب به ورسره وشي.
محمود زیاتوي:« دغو خلکو څه کاروبار و او دوی کول څه؟ دا دومره لویه سرمایه یې له کومه کړه؟ د دې حساب به کېږي، الله به یې کوي او ان شاءالله همدا مجاهدین به یې کوي او له همدغې وېرې دوی بهر ولاړل.»
اسلامي امارت په ټول هېواد له خپلې واکمنۍ سره سم د تېرو حکومتونو لوړپوړو چارواکو او سرتیرو ته عمومي عفوه اعلان کړه او ډاډ یې ورکړ،چې له هېچا غچ نه اخلي.
اخوا بیا د محمود وروستۍ څرګندونې د افغانانو له هرکلي سره مخ دي او د عدالت تامین لپاره د یوې ځانګړې محکمې پر جوړېدو ټینګار کېږي.
شنونکی فیض محمد ځلاند وايي:« ښه به دا و، چې طالبان عملي محکمې رامنځته کړي. د هغو خاینینو غلو هغه چې مشهور دي، په غصب باندې په خیانت باندې په جاسوسۍ باندې په پردي پالنه باندې او په لویه کې له وطن سره پر دښمنۍ باندې.»
عام ولس هم د اسلامي امارت له دې پرېکړې هرکلی او ملاتړ کوي او تمه لري،چې ټولنیز عدالت به پلی شي او په دې کار سره به دولتي او غیر دولتي شتمنۍ بېرته راوګرځي او افغانستان به پرمختګ وکړي.
د کابل ښار یو تن اوسېدونکی وايي:« د افغانستان اسلامي امارت کومه پالیسي چې روانه کړې ده، د زورواکانو لپاره دا ډېر ښه اقدام د، ځکه چې بیت المال دی او په دې کې ټول حق لري.»
د کابل ښار یو بل اوسېدونکی وايي:« مخکینۍ پانګې چې کومو خلکو بهر ته وړي دي یا یې په وطن کې بې باکي کړې د، د خلکو ځمکې یې نیولي دي، دا چې ثابته شي دا باید د کابل ښاریانو ته او په مجموع کې د ټول هېواد وګړو ته دا یو نیک اقدام دی. دا د دې لپاره وي، چې سبا ونه شي کړی، یو سړي په چل په فریب د چا پانګه یا کور غصب کړي.»
تر دې وړاندې د اسلامي امارت د عدلیې وزارت هم د استوګنو د لویو مېنو او ښارګوټو د ارزونۍ اعلان کړی وو، چې په خبره یې له لسو تر پنځلسو داسې لوی ښارګوټي شته دی، چې پر غصب شویو ځمکو جوړ شوي دي.
د مالوماتو له مخې، د افغانستان په بیېلابېلو ولایتونو کې د یو شمېر لویو ښارګوټو خاوندان پخواني سیاستوال او چارواکي دي،چې اوس له هېواده بهر اوسېږي.
