د افغانستان لپاره د امریکا ځانګړی استازی، چې د اروپایي او سیمې هېوادونو په سفر وتلی، مسکو ته یې په خپل لومړني سفر کې د افغانستان لپاره د روسیې له ځانګړي استازي ضمیر کابلوف سره د افغانستان په اړه خبرې کړي دي.
توماس ویسټ پر خپله ټویټرپاڼه یوازې همدومره لیکلي، چې له روسي چارواکو سره یې افغانستان کې پر ګډو ګټو خبرې کړي دي، خو څرګنده کړې یې نه ده، چې د دواړو هېوادونو داسې مشترکې ګټې څه دي، چې د بندو دروازو ترشاه پرې بحث شوی.
ویسټ زیاته کړې:«نن مې د افغانستان لپاره د روسیې له ځانګړي استازي ضمیر کابلوف او د روسیې امنیت شورا له مرستیال وینډیکوف سره ولېدل. له دوی سره مې په ګډو موخو خبرې وکړې او ټینګار وشو، چې طالبان دې له نړیوالې ټولنې سره کړې ژمنې عملي کړي.»
د افغانستان لپاره د امریکا ځانګړي استازي له طالبانو غوښتي، چې نړیوالې ټولنې سره شوې ژمنې عملي کړي.
د اسلامي امارت د ویاند مرستیال انعام الله سمنګانی وایي، ټولې هغه غوښتنې چې مشروع دي، په اړه یې هڅې روانې دي او نړیوالو سره یې په کړو هغو ژمنو عمل کړی دی، چې د دوحې په هوکړه کې درج شوي دي.
سمنګاني زیاته کړه:« اسلامي امارت د دوحې تړون او نړیوالو سره کړې ژمنې په سمه توګه عملي کړي دي. د نړیوالو مشروع غوښتنو لپاره هڅې شوي دي او هېڅ لوري ته د لاسوهنې اجازه نه ده ورکړل شوې، نو بناء هېڅ ګواښ نړیوالو ته له افغانستانه متوجه نه دی. اسلامي امارت خپل ملي او نړیوال مسوولیتونه سم سرته رسولي دي.»
اخوا د سیاسي چارو یو شمېر کارپوهان وایي، روسیه او امریکا د افغانستان په اړه پر پخواني سیاست روان دي او تر اوسه پورې یې سیاست کې بدلون نه لېدل کېږي.
د دوی په وینا روسیه او امریکا د ترهګرۍ په اړه ګډ مشترکات لري، خو دا چې د افغانستان په اړه یوه ګډه همغږي راغلې، دا د افغانستان د سولې او ثبات پر ګټه ده.
د سیاسي چارو کارپوه صفت ساپی وايي:« د واشنګټن او مسکو دغه اوسنی موقف د پخواني سیاست دوام دی. افغانستان کې دوی مشترکې ګټې لري او لویه ګټه طبعي خبره ده، روسانو لپاره د سیمې امنیت دی. همدا ډول د امریکا لپاره ښایي د تروریزم مسایل مطرح وي، خو د دوی ترمنځ دوامداره اړیکې او د افغانستان په اړه ګډ دریځ د سولې او ثبات سره مرسته کوي.»
افغانستان کې د تېرې شل کلنې جګړې یو ستر اړخ د امریکا او روسیې ترمنځ د نیابتي جګړو دوام وه، خو د کارپوهانو ټینګار دا ده، چې دغه هېوادونه دې افغانستان سره په ریښتینې مانا د همکارۍ لاس ورکړي او خپل هغه ناسالم رقابتونه پای ته ورسوي، چې هغه سیمه او افغانستان کې ثبات ګواښي.
