ټاکل شوې چې سبا پنجشنبه به په پاکستان کې د افغانستان په تړاو د ترویکا په نوم ناسته جوړه شي.
په دغه ناسته کې، چې د پاکستان په کوربتوب جوړېږي روسیه، چین او امریکا هم ګډون کوي.
په یاد کنفرانس کې به د روسیې او چین ځانګړي استازي برخه واخلي او دغه راز به د امریکا په استازولۍ په یاد کنفرانس کې افغانستان لپاره د واشنګټن ځانګړی استازی ټام ویسټ ګډون وکړي.
ویل کېږي، د افغانستان د بهرنیو چارو سرپرست وزیر امیر خان متقي هم دې غونډې ته وربلل شوی.
د ترویکا ناستې د بحث موضوعات به د افغانستان اوسنی وضعیت، بشردوستانه مرستې او نور مسایل وي.
د ترویکا کنفرانس تېره دوره په مسکو کې ترسره شوې وو، چې روسیې ویلي و د افغانستان په اړه دغه کنفرانسونه به دوام کوي او د دایمي ثبات راوستو لپاره به هڅه کېږي.
