راپورونه د پاکستان د اطلاعاتو ایالتي وزیر فواد چودري له قوله وایي، د عمران خان پر مشرۍ کابینې پرېکړه کړې، چې په افغانستان کې د لوږې او فقر کمولو لپاره دغه هېواد ته د خوراکي توکو صادرات ډېر کړي.
فواد چودري ويلي، په پام کې لري، چې زرګونه ټنه ورېژې او اوړه افغانستان ته ولېږي او مالیات پرې کم کړي، چې په دې توګه له افغانانو سره مرسته وشي.
چودري دا هم ویلي، چې پر افغان توکو به هم مالیات کم کړي، چې افغان سوداګرو ته زمینه برابره شي څو خپل توکي د پاکستان په بازارونو کې وپلوري.
پاکستاني چارواکي داسې مهال دا خبره کوي، چې افغانستان کې د تازه مېوو فصل د ختمېدو په حال کې دی او ډېری تازه مېوې په تورخم او سپین بولدک کې خوسا شوي.
د پاکستان په اړه ویل کېږي، چې هر کال د افغانستان د تازه مېوو موسم کې لارې تړي او افغان سوداګرو ته درانه مالي زیانونه اړوي.
