وېسټ زیاته کړه:« زه اروپايي او اسیايي هېوادونو کې د دې لپاره ګرځم،چې له خپلو متحدینو سره د افغانستان د وضعیت په تړاو خبرې وکړو. نړیواله ټولنه باید پر ګډه سره داسې یو اقدام وکړي،چې اغیزمن تمام شي. زه به پاکستان او روسیې ته هم ولاړ شم.»
توماس وايي، د طالبانو له لوري چې د ترهګرۍ پر وړاندې د مبارزې کومې ژمنې دي، دغو ژمنو تر ډېره د امریکا حکومت ډاډه کړی دی.
وېسټ زیاتوي:« موږ سره ژمنې شوې دي،چې افغانستان به یو ځل بیا د ترهګرو پر پټن ځایونو او روزنیزو مرکزونو نه بدلېږي او دا ژمنې متزلزلې نه دي. په کابل کې د امریکا د سفارت پرانېستلو په تړاو که ووایم،موږ لا تر اوسه پورې په دې تړاو په جدي ډول فکر نه دی کړی.»
راپورونه وايي،ټوماس به سبا په پاکستان کې د تورویکا پلس ناسته کې چې د افغانستان په تړاو جوړیږي،هم ګډون وکړي او له هغې وروسته به د سیمې یو شمیر نورو هېوادونو ته هم سفر وکړي او روان افغان کړکیچ په تړاو به بحثونه وکړي.
