د افغانستان خبريالانو ملي ټولنه وايي، یوشمېر ادرسونه په هېواد کې د خبریالانو له نوم ګټه پورته کوي او د خپلو کورنیو غړي او نور غیر مسلکي کسان د پیسو په بدل کې بهرنیو هېوادونو ته استوي.
یاده ټولنه ګواښ کوي،که دغه ډول ادرسونه اصلاح نه شي،نوم او هویت به یي ښکاره کړي او د مجازاتو غوښتنه به یې وکړي.
د یادې ټولنې د مطبوعاتي مسوول مسرور لطفي وايي:« دا یو ډول ګواښ دی،چې موږ یې کوو، که هره رسنۍ وي او دا کار کوي، یوه ورځ به افشاء شي او که ډډه ونه کړي، نو غږیز کلیپونه او نور اسناد به یې د رسنیو په واک کې ورکړو،چې په روښانه توګه یې ویلي چې په دومره قېمت باندې او یا ډالرو د فلانکۍ رسنۍ ټاپه کړي اسناد درکوو.»
د خبریالانو ملي تولنه له نړیوالو بنستونو هم غواړي،چې افغانستان کې له هرچا سره دې اړیکې نه نیسي او مالونو ادرسونو ته دې ورشي،چې حق حقدار ته وسپارل شي.
اخوا بیا دغه چارې پر کور دننه یو شمېر خبریالان او د رسنیو کارکونکي اندېښمن کړي،چې سختې دوی ګاللي،خو امتیاز هغوی ته ورکول کېږي،چې کار یې هم نه دی کړی.
خبریال وسیم تلاش وايي:« د خبریالانو له نوم یې استفاده وکوړه او خپل خپلوان يي بهر ته انتقال کړل،چې د خبریالانو په روحیه یې بده اغیزه کړې.»
خبریال نذیر شینواری وايي:« د تخلیې پروسې له پیله تر اوسه پورې د خبریالانو ملاتړو بنسټونو او ځینو رسنیو غیر مسلکي کسان واېستل،چې دا له خبریالانو سره جفا او خیانت دی.»
