پر افغانستان د اسلامي امارت له واکمنېدو وروسته د لومړي ځل لپاره د پولیو یا ګوزڼ ضد واکسین کمپاین پیل شو.
د واکسین یاد کمپاین د روغتیا نړیوال سازمان او یونیسیف ادارې لخوا د ټول هېواد په کچه نن پيل او تر څلورو ورځو به دوام وکړي.
د واکسینو دې پروګرام کې به هغو څه باندې درې میلیونه ماشومانو ته هم د واکسین څاڅکي ورکړل شي، چې تر دې مخکې دجګړې له امله محروم پاتې وو.
د ماشومانو ګوزڼ داسې ناروغي ده، چې درملنه نه لري او د پولیو واکسینو څاڅکي کولای شي د دې معلولیت مخنیوی وکړي.
مسوولین وايي، اوس پر دې ناروغۍ د اخته کېدو کچه ۹۹ سلنه ټیټه شوې.
یونېسف ویلي، طالبانو ډاډ ورکړی، چې ښځینه واکسیناتورانې هم کولی شي دې کمپاین کې برخه واخلي.
روغتیا وزارت وايي، دغه کمپاین به څلور ورځې دوام وکړي او د ټول هېواد په کچه به نهه اعشاریه نهه میلیونه ماشومانو ته د پولیو واکسین ورکړل شي.
