د افغانستان اسلامي امارت د تصفيې کمېسيون مسوولین د خپلو ولايتي سفرونو په لړ کې دا ځل بلخ ولايت ته تللي او هلته یې په ولايت مقام کې له سيمه ييزو ملکي او نظامي چارواکو سره ناسته وکړې.
د اسلامي امارت د استخباراتو رئیس او د تصفيې کمېسيون مرستيال مولوي عبدالله غزنوي په خپلو خبرو کې ټينګار وکړ، چې مفسد او ناوړه استفاده کوونکي افراد به له خپلو ليکو باسي او قانوني چلن به ورسره کوي.
غزنوي زیاته کړه:« دا اسلامي نظام به هغه مهال په ښه ډول حاکمېږي، چې واقعا زموږ په ليکو کې اخلاص، تقوا، ديانت او له ملت سره ښه سلوک وي، په ليکو کې غدر، فساد او چور بايد په هېڅ صورت نه وي.»
غزنوي زیاته کړه:« نن سبا موږ او تاسې ته ملت سترګې پر لار ده. له موږ او تاسې عدل، انصاف او محکمې ته د مجرم سپارل غواړي. په دغه لومړي پړاو کې زموږ او تاسې له خوا ځيني داسې واقعات پېښ شول، چې په هغه کې د ملت ځورونه وه، همدا لامل وو، چې مشرانو د تصفيې دغه کمېسیون جوړ کړ.»
په ورته مهال شمال زون کې سيمه ييزو نظامي او ملکي مسوولينو د اسلامي امارت د مشرتابه د ياد اقدام ستاينه او ملاتړ وکړ او ډاډ يې ورکړ، چې په دې سره به د اسلامي امارت د ځواکونو صفوف تصفيه شي.
د بلخ والي قدرت الله ابوحمزه وايي:« نن د صف د ډېروالي په خاطر يا نورو دنيوي اغراضو لکه د اعاشې او اباطې اخېستو په خاطر مفسد او غله او منفور کسان له ځانو سره بايد ونه ګرځو، که دا کار کېږي، دا به واقعا له شهيدانو او د هغوی له کورنيو سره جفا وي. موږ بايد خپله درک ولرو او دغسې کسانو ته ځای ورنه کړو.»
د مزار د قول اردو قوماندان عطاالله عمري وايي:« په لیکو کې د ناوړه کسانو شتون زموږ د مشرانو، شهيدانو او فدايانو ارمانونه له منځه وړي، دې موضوع ته پاملرنه کول ډېره اړينه وه او خدای دې د اسلامي امارت مشرانو ته خير په نصيب کړی.»
