له اغاخان بنسټ د اسلامي امارت غوښتنه؛ افغانستان کې پانګونه وکړئ

د اسلامي امارت د لومړي وزیر مرستیال عبدالسلام حنفي د اغا خان بنسټ استازي سره لیدلي او ډاډ یې ورکړی، چې د فعالیتونو لپاره به ورته لازم شرایط او اسانتیاوې برابرې کړي.

په افغانستان کې د اغاخان بنسټ ځانګړي استازي علي اکبر پسناني پرون د ریاست الوزرا مرستیال عبدالسلام حنفي سره کتلي دي.

حنفي د افغانستان ابادۍ برخه کې د اغاخان بنسټ د ټولو فعالیتونو هرکلی کړی او ترې غوښتي یې دي، چې افغانستان کې دې یو معیاري او مجهز روغتون جوړ کړي، تر څو خلک د درملنې لپاره بهر ته سفر کولو ته مجبور نه شي.

عبدالسلام حنفي د لیدنې په پای کې شهزاده کریم اغاخان ته د نیکو هیلو ترڅنګ نوموړي ته افغانستان ته د سفر بلنه هم ورکړې ده.