ویګیلار وايي:« یونیسف داسې یو سیسټم جوړوي،چې له مخې به یې د افغانستان ښوونکو ته د ځايي واکمنانو له لاسوهنې پرته په مستقیم ډول معاشونه ورکول کېږي. افغانستان کې د نجونو د زده کړو ملاتړ یوازینی لار دا ده،چې د ښوونکو او ښوونځیو ملاتړ وشي. موږ په مرستندویانو غږ کوو،چې د افغانستان ماشومان هېرنه کړي.»
ویګیلار ویلي،د یادو مرستو لپاره یو سیسټم په پلان کې لري،چې له مخې به یې د افغانستان ټول ښوونکي په کې ثبت کېږي او مرستې به د طالبانو له دخالت پرته په مستقیم ډول ورکول کېږي.
خو اسلامي امارت بیا که څه هم د یادو مرستو هرکلی کوي او اړینې یې بولي،خو خبرداری ورکوي،چې دا مرستې به د دوی تر څار لاندې ترسره کېږي.
د اسلامي امارت د مطبوعاتو غړی بلال کریميوايي:« ټول هغه نړیوال مرستندویان،چې له افغانستان سره مرستې کوي،موږ یې هر کلی کوو او د مرستې ژمنه ورسره کوو. د یونیسف دا مرستې به هم په افغانستان کې د اسلامي امارت تر څار لاندې ویشل کېږي.»
د سیاسي چارو شنونکي وايي،طالبان باید په اوسني وضعیت کې د دغو مرستو هرکلی او ملاتړ وکړي او په مقابل کې یې د نړیوالو سالمو غوښتنو ته هم مثبت ځواب ووایي.
شنونکی توریالی ځاځی وايي:« د یونیسیف مرستې یو ښه اقدام دی او طالبان یې باید منندوی واوسي. طالبان هم باید د نړیوالو سالمو غوښتنو ته مثبت ځواب ووایي. دا مرستې به د هېواد له پوهنې سکتور سره ډېره مرسته وکړي.»
له څه باندې دوه نیمو میاشتو راپدیخوا چې اسلامي امارت پر ټول هېواد واکمن شوی،د نجونو منځني ښوونځي او لیسې تړل شوي،چې له امله یې کابو درې میلیونه زده کوونکي له زده کړو وروسته پاتې دي.
اسلامي امارت بیا ډاډ ورکوي،چې پر ځانګړي میکانیزم یې کار پيل کړی او د وروستي کېدو په حال کې دی او نږدې راتلونکې کې به د نجونو ښوونځي بېرته پرانیستل شي.
مالیې وزارت هم تازه خبر ورکړی دی،چې د پوهنې وزارت په ګډون د پنځه وزارتونو تنخواوې تادیه کوي.
