Skip to content
پر سردار محمد داود خان روغتون د تېرې ورځې برید کې پنځه بریدګر او اوه نور کسان وژل شوي دي.
د اسلامي امارت ویاند ذبیح الله مجاهد پر خپله ټویټر پاڼه لیکلي، د تېرې ورځې برید د ۵ داعشیانو په له منځه وړلو سره پای ته ورسېد.
مجاهد ویلي، د برید پر مهال د روغتون د باندې درې ښځې، یو ماشوم او درې د اسلامي امارت مجاهدین وژل شوي دي.
دغه راز په یاد برید کې ۵ نور کسان بیا ټپیان شوي هم دي.
که څه هم د دغه برید مسوولیت تر اوسه چا پر غاړه نه دی اخیستی، خو اسلامي امارت یې پړه پر داعش ډلې اچوي او داسې اوازې هم دي، چې دوه کسان یې ژوندي نیولي، چې بهرنیان دي.
دغه برید په کور دننه او بهر په کلکو ټکو غندل شوی دی.
پخواني ولسمشر حامد کرزي د غندنې ترڅنګ دا برید د بشر ضد او د بهرنیانو دسیسه ګڼلې او د دې دسیسو د پای لپاره یې د حالاتو پر سم درک او یووالي ټینګار کړی.
ډاکټر عبدالله عبدالله هم پر یاد روغتون برید په کلکو ټکو غندلی او زیاته کړ یې ده، چې د روغتون په څېر عامه ځایونه باید امن وي.
یوناما هم یاد برید ته غبرګون ښودلی او ویلي یې دي، چې پر روغتونونو او ملکي خلکو بریدونه د بشري حقونو او نړېوالو قوانینو څخه سرغړونه ده.
یوناما غوښتنه کړې، چې د پېښې عاملین دې د قانونو منګولو ته وسپارل شي.
