د افغانستان ځوانانو ملي ایتلاف نن چهار شبنه د « ۱۴۰۰ کال د لړم پر ۱۲ مه » د یوه خبري کنفرانس پر مهال وویل،نړيواله ټولنه او امریکا دې نور له زور زیاتي او فشارونو تېر شي او د افغانانو شتمنۍ دې بېرته ازاده کړي.
د افغانستان ځوانانو ملي ایتلاف مشر محمد علي جعفري وايي:« زموږ غوښتنه له نړیوالې ټولنې دا ده،چې دغه کنګل کړې پیسې دې ازادې کړي،ترڅو اقتصادي وضعیت تغیر وکړي او خلک په غوره حالت کې ژوند وکړي.»
یاد ایتلاف له اسلامي امارته هم ځينې غوښتنې درلودې، دوی د ځینو هغو ادارو بیا فعالیدل غواړي،چې اوسمهال پر ټپه ولاړې دي او خدمات نه وړاندې کوي.
د افغانستان ځوانانو ملي ایتلاف مشر محمد علي جعفري وايي:« د برېښنایي پېژندپاڼو تر اوسه تړل شوې سایټونه یې بند دي.غوښتنه مو له امارته دا ده،چې ټول سایټونه دې خلاص شي،چې خلک پېژندپاڼې واخلي.»
د افغانستان ځوانانو ملي ایتلاف غړې سکینه رضایي وايي:« دولتي ادارې د تېر په څېر خپلو فعالیتونو ته دوام ورکړي او د خلکو لپاره دې اته ساعته کار وکړي او د ځینو دولتي ادارو فعالیدل هغه هم د ورځې څلور ساعته لپاره نه شي کولی،چې د خلکو اړتیاوې پوره کړي.»
د یاد ایتلاف غړو د بیو لوړېدو مخنیوي په اړه هم له امارته غوښتنه وکړه،چې پر بازارونو دې کنټرول زیات کړي.
کنفرانس کې همدا راز د نړیوالو له خوا د مرستو پر عادلانه ویش او مدیریت هم ټینګار وشو.
د افغانستان ځوانانو ملي ایتلاف غړی عبدالله دولت وايي:« هغه مرستې چې نړیوال یې کوي، دا باید هغو کسانو ته ووېشل شي،چې اړمن وي او د مرستو له حیف ومیل دې مخنیوی وشي.»
د ځوانانو ملی ایتلاف وایي، امارت دې ټولې دولتي ادارې فعاله کړي او ځوانانو ته دې د کار کولو زمینه برابره کړي.
