په کندز او کندهار ولایتونو کې د شیعه ګانو پر عبادت ځایونو له خونړیو بریدونو وروسته د پکتیا مرکز ګردیز ښار کې میشت شیعه ګان د خپل امنیت په اړه اندېښنه څرګندوي.
دوی وایي، له دغه بریدونو وروسته یې د خپل خوندیتوب په اړه اندیښنې ډېرې شوي او ویره لري،چې پر عبادت ځایونو به یې ورته بریدونه وشي.
د ګردیز یو تن اوسېدونکی وايي:« کندز او کندهار کې د شیعه مسلمانانو پر عبادت ځایونو له خونړیو بریدونو وروسته له موږ سره د خپل امنیت په اړه اندیښنې پیدا شوي دي. زموږ خلک ډاډمن امنیت غواړي.»
د ګردیز یو بل تن اوسېدونکی وايي:« څوک د مسلمانانو پر جوماتونو او عبادت ځایونو بریدونه کوي،دا خلک ناکام دي،خو زموږ غوښتنه دا ده،چې باید مخه یې ونیول شي.»
ګردیز کې میشت شیعه ګان وایي، د اسلامي امارت له امنیتي مسوولینو سره په اړیکه کې دي،خو په خبره یې په ټولییز ډول غوښتنه یې د استوګنې سیمو او عبادت ځایونو امنیت خوندي کیدل دي.
د ګردیز یو تن اوسېدونکی وايي:« کله چې کندز او کندهار کې بریدونه وشول د اسلامي امارت مسوولینو له موږ سره اړیکه ونیوه، غمرازي یې وکړه او د امنیت ډاډ یې را کړ.»
د ګردیز یو بل اوسېدونکی بیا داسې وايي:« زموږ امنیت لا باید لا غوره شي، نور خو پکتیا کې په ټولییز ډول وضعیت ښه دی. دلته مذهبي تفرقو ته ځای نه شته دی شیعه او سني مسلمانان لکه د وروڼو په څېر ژوند کوي.»
د پکیتا امینه قوماندان مولوي محمد عمر مخلص وایي، ګردیز کې د شیعه ګانو امنیت ټینګ شوی او د لا خوندیتوب لپاره یې پر یوه ځانګړي پلان کار کوي.
مخلص زیاته کړه:« د وسلو ویشل مو ورته په نظر کې دي. له دوی سره مو ناستې کړي، د خوندیتوب ډاډ ورکړل شوی دی. هر وخت ورسره په اړیکه کې یو او په ګډه پر داسې طرزالعمل کار کوو،چې امنیت یې په بشپړ ډول خوندي شي.»
د ۲۰۱۸ کال د دسمبر پر ۳۰ ګردیز کې د جمعې لمانځه پر مهال دوه وسله وال چې د ښځو کالي یې پر تن وو، خواجه حسن جومات کې یې ځانمرګي بریدونه وکړل، له کبله یې شااوخوا ۳۰۰ کسانو ته مرګ ژوبله واړوله.
