ننګرهار کې وسله وال برید؛ یو دیني عالم وژل شوی

ناپېژاندو وسله والو نن سهار د جلال آباد ښار کابل هډې ته څېرمه د معیوبینو په فامیلیو کې یو دیني عالم او د جومات خطیب په ډزو وژلی دی.

ځایي سرچینې وايي، د مفتي عبدالواحد په نوم یو دیني عالم، چې د معیوبینو د جامع مسجد خطیب هم وو، نن سهار په داسې حال کې چې د لمانځه لپاره په اوداسه بوخت وو، د ناپېژاندو وسله والو له لورې په ډزو ویشتل شوی او وژل شوی دی.

تر دې دمه د یادې پېښې په تړاو رسمي سرچینو څه نه دي ویلي.

د یادولو وړ ده، چې څو ورځې وړاندې هم په جلال اباد ښار فامیلیو سیمه کې یو بل دینې عالم هم د ناپېژاندو وسله والو له لوري وژل شوی وو.