ملګرو ملتونو ویلي، افغانستان کې د میلیونونو کسانو لپاره د خیریه مرستو رسولو لپاره پوره نغدې پیسې نه شي لېږدولی.
د ملګرو ملتونو یو لوړپوړي چارواکي د نوم نه ښودلو په شرط رویټرز خبري اژانس ته ویلي، د افغانستان د اقتصادي سقوط د مخنیوي لپاره سیاسي حل لارو ته اړتیا ده.
یاد سازمان ویلي، په څو لارو چارو غور روان دی، چې څنګه کېدای شي پر افغانستان بندیزونه لرې شي، چې له مخې به یې حکومتونه او ادارې په بهر کې د افغانستان کنګل شوې شتنمي ازاده کړي.
د ملګرو ملتونو سرمنشي انتونیو ګوترېش د پیسو له نړیوال وجهي صندوق یا ای ام ایف غوښتي، چې افغانستان ته د پیسو لېږلو په هکله دې پر میکانیزمونو او یا هم د قانون پر اسانه کولو هوکړه وشي.
د ۹ اعشاریه ۵ ملیارده هغه ډالرو ترڅنګ، چې په متحده ایالاتو کې کنګل شوي د پیسو نړیوال وجهي صندوق (آی ایم ایف) هم د افغانستان ۴۴۰ میلیونه ډالر بند کړي دي.
