د افغانستان بهرنیو چارو وزارت دوحه کې د دوه ورځنیو مذاکراتو له پایته رسېدو وروسته ویلي،دغې ناسته کې ټینګار شوی،چې بشري مرستي باید له سیاسي مسایلو سره ونه تړل شي.
په خبرپاڼه کې ویل شوي،چې اسلامي امارت د ټولو ستونزو حل د دوحې تړون ته ژمنتیا او بشپړ عملي کول یوازینۍ لاره بولي.
د اسلامي امارت پلاوي له امریکا سره په سیاسي مسایلو هم بحثونه کړي،خو واضح کړې یې نه ده،چې دا مسایل څه دي؟
د بهرنیو چارو وزارت ویاند عبدالقهار بلخي وايي:« په دوحه کي د ا.ا.ا او د امریکا د متحده ایالاتو د هیتونو تر منځ دوه ورځنۍ خبري په ښه ډول تر سره شوې. په ناسته کي په سیاسي موضوعاتو تفصیلي خبري وشوې او اسلامي امارت د دوحې د تړون بشپړ عملي کول د ستونزو د حل غوره لاره وبلله او دا چي بشري مرستي باید له سیاسي مسایلو سره و نه تړل شي.»
په دوحه کې د مذاکراتو په درشل کې چې ویل کېږي،سپیني خبري په کښي شوي د تفاهم یو ښه فرصت یاد شوی او په دې خبره توافق شوی دی چې د اړتیا پر مهال به راتلونکې کې هم دوام ورکوي.
د سیاسي چارو تحلیل کوونکی طارق فرهادي وايي:« د دوحې مذاکرات بریالي وو، په دې خاطر کوم،څه چې د افغانستان خلکو غوښتنه وه،چې بشري مرستې زیاتې شي، په داسې وخت کې چې فقر زیات شوی دی. په سیاسي لحاظ هم باور جوړونه پیل شوه،دواړه لوري یو د بل په غوښتنو باندې پوه شول او لازمه هم دواړو خواوو ته دا وه،چې یو د بل پر شرایطو باندې پوه شي،چې دا هم پیل شوې ده.»
خو له دې سره انګېرنې دا دي،چې کېدای شي د طالبانو او امریکا ترمنځ په استخباراتي مسایلو هم بحثونه او توافقات شوي وي.
د سیاسي چارو تحلیل کوونکی عزیز معارج شنونکی وايي:«انګېرنه دا ده،چې کېدای شي، دلته په استخباراتي مسایلو هم بحث شوی وي،ځګه طالبان د اکتوبر پر ۲۰ مه مسکو ته ځي. پر نړیواله کچه په لومړي ځل کنفرانس کې ګډون کوي او له بل پلوه چین سره هم د دوی د اړیکو مسله ده. بل لور ته د جي شل هېوادونو ناسته هم ده،ښایي دا خبرې هم اوسي.»
اوس چې مسکو یو نړیوال کنفرانس ته تابیه نیسي امریکا له چین او روسیې سره د طالبانو له اړیکو اندېښنه لري.
