که څه هم ملګرو ملتونو ویلي و، چې د افغانستان په استازیتوب به د تېر حکومت استازی غلام محمد اسحق زی خبرې وکړي، خو هغه خپله له خبرو کولو ډډه وکړه.
سرچینې وایي، تېره ورځ غلام محمد اسحق زي په ملګرو ملتونو کې د ویناوالو له لیسته خپل نوم حذف کړ.
په ملګرو ملتونو کې د افغانستان د مخکیني حکومت استازي غلام محمد اسحق زي ویلي، د ملي ګټو خوندي کولو لپاره یې عمومي اسمبلۍ ته له وینا کولو ډډه وکړه.
ملګرو ملتونو کې د افغانستان دایمي استازولۍ په خپل ټویټر لیکلي، د ملي ګټو، په ملګرو ملتونو کې د افغانستان څوکۍ خوندیتوب او د اوږده مهال لپاره د ملګرو ملتونو او امنیت شورا له غړو سره د همکاریو د دوام لپاره د عمومي اسمبلۍ په عمومي غونډه کې له وینا کولو ډډه وشوه.
په ټویټر پیغام کې دا هم ویل شوي، چې دایمي استازولي به د افغانستان څوکۍ خوندي ساتلو سره سره خپل کار او فعالیتونه روان ساتي.
اسلامي امارت تېره اونۍ ملګرو ملتونو ته یو لیک استولی و، چې په کې دغې غونډه کې د بهرنیو چارو وزیر امیر خان متقي د ګډون غوښتنه شوې وه او لیکل شوي و، چې اسحاق زی په ملګرو ملتونو کې له دې وروسته د افغانستان استازی نه دی.
