Skip to content
د سپین بولدک – چمن تر منځ دروازه کې لا هم هره ورځ زرګونه سوداګر، کاروباریان او ناروغان پاکستان ته د تللو هڅه کوي،خو د نامنظم سیسټم له امله ګڼه ګوڼه زیاته ده او ډېری وخت د مسافرو د مرګ ژوبلې لامل کېږي.
پر دغه دروازه پاکستان ته اوښتي مسافر وايي، یاده دروازه کې د ګڼې ګوڼې تر څنګ د پاکستاني پولیسو له لوري د مسافرو وهل ډبول اوس یوه عادي خبره ګرځېدلې او په خبره یې اوښتتونکو ښځینه مسافرو سره د پاکستاني پولیسو د ناوړه چلن پېښې هم زیاتې شوي دي.
پاکستان ته تلوونکي مسافره زرغونه وايي:« دلته له څو ورځو راهیسې انتظار وم، کله چې تر دروازه تېره شومه، پاکستاني پولیسو ته مې د خپل خاوند پاکستانی شناخت کارټ ښکاره کړ، هغې نه منی، زه یې ووهلم، زما زوی یې وواهه، بد رد یې هم راته وویل.»
د یادې دروازې دې خواته ولاړ طالب چارواکي،چې د خلکو په منطم کولو بوخت دی وایي، هڅه کوي، له دروازې دې خواته تلونکي مسافر منظم او ګڼه ګوڼه کمه شي.
یو طالب چارواکی وايي:« دلته ولاړ یم، د خلکو او تلوونکو مسافرو د نظم دنده را پر غاړه ده. ګڼه ګوڼه زیاته ده،د خلکو شمېر ډېر دی، خو هڅه کوو،چې دا ګڼه ګوڼه کې خلکو ته د زیان مخه ونیسو.»
په سپین بولدک کې د افغان کمېساري مسوولین وايي، دوی ته تر اوسه د لارې د ستونزو حل په اړه ډاډ نه دی ورکول شوی.
سپین بولدک ولسوالۍ کې افغان کمیسار زاعم آغا وايي:« موږ هڅه کوو،چې دغه ستونزه له دوست هېواد پاکستان سره د خبرو له لارې حل کړو،خو اصل ستونزه د دغې لارې لغړیانو جوړه کړې. د دوی د بې غورۍ له امله مسافر په ستونزه کې وي. هغه کسان چې پاکستان ته د تللو اړتیا یې زیاته نه وي، پر دغه لاره دې نه ځي.»
تر دې وړاندې د کندهار والي ملا محمد یوسف ویلي،د پاکستاني کونسل سره یې د یادې لارې په اړه خبرې کړي دي.
پر دغه لاره د خلکو د زیاتې ګڼې ګوڼې له امله کله کله د مسافرو د مرګ ژوبلې خبرونه هم ورکول کېږي.
له تېرو دوه میاشتو راهیسې پر دغه لاره د خلکو ګڼه ګوڼه او بې نظمۍ زیاتې شوي، نه یوازې د دواړو هېوادونو تر منځ سوداګرۍ ته دروند زیان رسېدلی،بلکې هغه کسان هم له ستونزو سره مخ شوي،چې د درملنې او نورو اړتیاوو لپاره پاکستان ته ځي.
