د ملګرو ملتونو سرمنشي انټونیوګوترس وايي، اوس مهال افغانان له بد حالت سره مخ دي او که ملګري ملتونه او نړۍ په افغانستان کې ښکیله پاتې نه شي،ستر انساني ناورین به رامنځته شي.
ګوترس وايي، په اوسنیو شرایطو کې،چې په افغانستان کې هرڅه له نامالوم برخلیک سره مخ دي،ملګري ملتونه او نړۍ باید افغانان یوازې پرې نږدي .
د ګوترس په خبره، نړیوال باید دې ته اړ اېستل شي،چې له افغانستان سره بشري مرستې وکړي.
ګوترس زیاتوي:« موږ باید په افغانستان کې ښکیل پاتې شو. موږ اوس مهال نه پوهېږو،چې وضعیت کوم لور ته روان دی او څه وخت به پرمختګونه رامنځ ته شي،خو دومره پوهېږم، که موږ هلته ښکېل نه شو نو حالت به نور هم خراب شي. موږ باید نړیوال دې ته اړ باسو،چې له افغانستان سره بشري مرستې وکړي. اوس مهال افغانان په ډېر بد حالت کې دي او هغوی سره باید د خوراکي توکو او درملو مرسته وشي او باید له دغه بد حالته یې د وتلو په موخه ملاتړ وشي.»
ګوترس یوه اوونۍ وروسته له هغې دغه څرګندونې کوي،چې نوموړي د ملګرو ملتونو ځانګړې ناسته کې ویلي ول،چې ۱۸ میلیونه افغانان بېړنیو بشري مرستو ته اړتیا لري او په وینا یې وېره لري،چې یو شمېر افغانان به له لوږې ومري.
اخوا د سیاسي چارو شنونکي بیا وايي، افغانستان له جدي اقتصادي بحران سره مخ دی او هرهغه چې د افغان ولس له جیب سره مرسته کوي،هغه په ټپه دریدلي دي .
