Skip to content
د کابل روغتونونو کې روغتیاپالانو اندیښنه څرګنده کړې،چې ډېری ناروغانو ته مناسب درمل نه رسېږي او په خبره یې دا یې د له منځه تللو لامل کېږي.
د روغتونونو مسوولین وايي،د درملو د نه شتون سربېره روغتونونه د ډاکټرانو له کمبود سره هم مخ دي ځکه ډاکټرانو ته د معاشونو د نه رسیدو له امله هغوی دندو ته د راتګ لپاره زړه نه ښه کوي.
د کابل د یوه روغتون روغتیاپال وايي:« دا ښه خبره نه ده،چې د افغانستان ولس دې یوازې پریښودل شي. نړیوال باید د افغانستان ملاتړ وکړي. هغوی باید د دې روغتیاپالانو ملاتړ وکړي. زه یو پورفیسر یم، زما مالي ملاتړ باید وشي.»
د درملو او ډاکټر نه شتون ور اخوا د بانکونو نه پرانېستل او په مناسبه بڼه د خدماتو نه وړاندې کول هم په یوه ستره ستونزه بدل شوي دي.
کابل کې د بانکونو مخ ته راټول شوي کسان وايي، بانکونه بند دي او د یوې مړۍ ډوډۍ پیسې ورسره نه شته،نو د درمل او روغتون ته تلل خو وروستۍ خبره ده.
د کابل ښار یو تن اوسېدونکی وايي:«اوس مهال په افغانستان کې اوسېدل ډېر سخت کار دی،ځکه دا پیسې زموږ خپلې دي او هغوی اخیستي او ځان سره یې ساتلې دي. دوی اوس ان زموږ خپلې پیسې نه راکوي.»
د کابل ښار یو بل تن اوسېدونکی وايي:« دا ستونزه د ولس ده، د حکومت نه ده. د حکومت چارواکي خو خوندي ناست دي،خو تاسې دې خلکو ته وګورئ. دوی په کور کې د خوړو لپاره هېڅ نه لري.»
د عبدالرشید دوستم کور ته ننوتي طالبان د تیر نظام چارواکي پړ ګڼي،چې ولس یې وږی پریښی او خپل ځان ته یې ښکلې ماڼۍ جوړې کړي دي.
په روغتونونو کې د درملو د نه شتون اندیښنه داسې مهال راپورته کېږي،چې په تېرو دوه اونیو کې له خوراکي توکو او درملو ډکې قطري الوتکې په کابل هوايي ډګر کې ښکته شوې، خو اوس پوښتنه دا ده،چې دغه درمل کومو روغتونونو ته وړل شوي او د خوراکي توکو مرستې چاته رسیدلي دي.
