Skip to content
له کابل نړیوال هوايي ډګره بهر ته د تللو په نيت کلن ځوان عظيم الله تېره مياشت د الوتکې وزرونو پسې له نښتلو وروسته خپل ژوند له لاسه ورکړ.
مطيع الله د عظیم الله مشر ورور دی، وايي، عظيم الله حربي پوهنتون لوستی و او اوس يې نظامي زده کړې د سرحدي پوليسو په اکاډمۍ کې تر سره کولې.
هغه وايي، چمتو کړی مونوګراف يې بې امضاء پاتې شو او د ورور د فراغت او خدمت ارمان يې پوره نشو.
مطيع الله وايي: «د حربي پوهنتون محصل و، کله چې له حربي پوهنتونه خلاص شو، بيا نظامي اکاډمۍ ته کامياب شو، بيا اکاډمۍ پوليسو ته کامياب شو. وروسته له هغې د سرحدي پوليسو پوهنځي ته کامياب شو، تقريباً دوه میاشتې وروسته يې فراغت و.»
مطیع الله وايي، عظيم الله يې د کور د نفقې پيدا کولو یوازینی کس وه او اوس له ګڼو اقتصادي ستونزو سره مخ دي.
مطيع الله په يو ه خصوصي ښوونځي کې په اته زره افغانيو استادي کوي.
دی وایي، له څو میاشتو راهیسې یې تنخوا نه ده اخیستې او د څوارلس کسانو سرپرستي ورترغاړې ده.
مطيع الله زیاتوي: «زموږ یوازې اقتصادي وضعيت خراب دی، هغه که فراغه شوی وای، د سرحدي پوليسو له پوهنځي څخه نو په يو ښه بخش کې به يې وظيفه وه. يو زه تنخوا لرم او پلار مې، هغه هم اوس بې دندې شو. یوازې زه اوس تنخوا لرم او هغه هم نهه زره يا اته زره،نو نه کېږي، ۱۲ يا ۱۳ کسانو کور دی.»
د مړ شوي کس کاکا امرالله بیا وايي: «اوس د وظيفې و چې د پلار او کورنۍ لاس ونيسي. نو هغه تشه خو ډېره لويه تشه ده. هغه بااستعداده هلک و. ډېر بااخلاقه هلک و، يو ډېر انسان هلک و، نو ډېره لويه تشه ده، د هغه پلار يې اوس يو څه ناڅه وظيفه لرله، هغه هم اوس په کور کېناست. دغه ورور يې هم اوس په کور دی. نو مشکلات زیات دي.»
د عظيم الله کوچنی ورور نصر الله په ژړغوني غږ او نمجنو سترګو د خپل ورور خاطرې داسې یادوي: «موږ په ورور پسې ډېر خفه يو. هغه زموږ مشر ورور و. مهربانه و. موږ به یې کله کله بیولو. درسونه به یې راسره ویل. موږ ډېر ورپسې خفه يو.»
د عظيم االله کورنۍ اوس هغه انځورونه چاپ کړي،چې دی په کې له الوتکې راغورځي، پر ځمکه پرېوتی او په يو بل انځور کې ښکاري،چې کورنۍ يې قبر ته ناسته ده. دوی وايي، همدې انځورونو په کتو به د ژوند سختې تېروي، خو په هېواد کې د سولې او امن هېله به هم ولري.
