د ملا برادر په مشرۍ د طالبانو یو پلاوي له ایراني چارواکو سره لیدلي او په یو لړ مسایلو غږیدلي دي.
قطر کې د طالبانو د سیاسي دفتر ویاند سهیل شاهین په یو ټوېټ کې لیکلي، چې یاد پلاوي د افغان شخړې د سوله ییز حل سربېره په ګڼو نورو موضوعاتو بحث کړی دی.
کابل کې تحلیل دا دی چې په افغان سوله کې د ایران رول د ایران د ارادې پورې اړه لري.
له یوې مودې راپدېخوا طالب سیاسي پلاوي، په سیمه کې د باورجوړونې لپاره د سیمې هېوادونو سفرونه پیل کړي دي چې تازه طالب پلاوی ایران ته تللی او د ایران له بهرنیو چارو وزیر سره یې په یو لړ مسایلو خبرې کړي دي.
په قطر کې د طالبانو د سیاسي دفتر ویاند سهیل شاهین داسې ویلي ((د ا.ا.امارت سیاسي مرستیال او د سیاسي دفتر مشرمحترم ملا برادر اخند او ورسره هئيت یې د ایران د اسلامي جمهوریت د خارجه وزیر جواد ظریف او ورسره هئيت سره په تهران کې وکتل. دواړو خواوو د افغانستان د مسئلې په سوله ایز حل او د سولې د پروسې په هکله تفصیلي خبرې وکړې))
ایراني رسنیو لیکلي، جواد ظریف په دغه لېدنه کې د بین الافغاني ناسې د برابرولو په برخه کې د ایران چمتووالی ښودلی.
تحلیل دادی، چې ایران د افغانستان سره د سلګونه کېلومټره ګډې پولې او دوه میلیونه افغان مهاجرو په لرلو په افغان سوله کې د ایران رول د خورا پاملرنې وړ دی.
افغان حکومت ایران ته د طالب پلاوي د سفر په اړه غبرګون نه دی ښودلی، خو په تېر کې د سیمې هېوادونو ته د طالبانو سفرونه يې بې ګټې بللي او غوښتنه یې داوه، چې طالبان دې مخامخ له افغان حکومت سره خبرې وکړي..
