ارګ وايي، ایتلافونه باید د کړیچ د رامنځته کېدو لپاره نه وي.
وروسته له هغې چې ټاکنو کمېسیون د ځېنو ټیکټونو د قناعت له ورکړې پرته د بیا شمېرنې پروسه پیل کړه ورسره جوخت په کمېسیون هم توندې نیوکې وشوې.
ګلبدین حکمتیار، عبدالله عبدالله او رحمت الله نبیل هغه نوماندان دي چې د پروسې له پیل سره مطلق مخالف دي او په دې برخه کې یې نیوکه ان د ګواښ تر سرحده رسېدلې.
په دې لړ کې د حزب اسلامي امیر ګلبدین حکمتیار په تېر او اوس کې د خپل سرسخت سیاسي مخالف د جمعیت اسلامي ګوند له نوماند عبدالله عبدالله سره لیدلي چې خبرې یې د ټاکنو په پروسې متمرکزې ښودل کیږي.
ارګ وايي، هیڅوک حق نلري چې ملي پروسې یرغمل ونیسي او ایتلافونه هم باید د کړکیچ د رامنځته کېدو سبب نشي.
د ملي شورا غړو د ټاکنو په تړاو د مخالفو جهتونو په لیدنې غبرګون ښودلی.
وکیلان وايي دوی د خپلو شخصي ګټو لپاره غواړي په خپلو کې ایتلاف وکړي چې دا مسله د هېواد په ګته نه ده.
ټاکنو کمېسیون هم د مهالویش له مخې په خپل کار کې پاتې راغلی بلل کیږي او د څار بنسټونو او ولسي استازو غوښتنه دا ده که دوی خپل اصلي مسولیت ته متوجه نشي وضعیت به د دوی لاسه کړکیچن شي.
