د ژبژغورنې ملي غورځنګ د وزیرمحمد ګل خان مومند ستاېنه وکړه.
پښتو ژبې ته د وزير محمد ګل خان مومند خدمتونه د ستايلو دي.
د ژبژغورنې ملي غورځنګ علومو اکاډمۍ کې د وزير محمد ګل خان مومند په تړاو يو علمي سيمينار جوړ کړ.
د سيمينار ګډونوالو محمد ګل خان مومند يو سياسي، علمي او فرهنګي شخصيت یاد کړ او د هغه خدمتونه نه هېرېدونکي بولي.
ليکوال او څېړونکی حبيب الله رفيع وايي، وزير محمد ګل خان مومند هر اړخيز شخصيت در لود.
ليکوال او څېړونکي حبيب الله رفيع داسې وویل (( اروا ښاد محمد ګل بابا یو هر اړخیز شخصیت و، سیاسي شخصیت و، حربي شخصیت و، اداري او فرهنګي شخصیت و د هېواد خدمتګار و او د هېواد په هره برخه کې چې اړتیا ورته پيدا شوې ده برخه په کې اخستې او خدمت یې کړی دی.))
رفيع وايي، مومند يو پښتون، په پښتو او پښتونولۍ مين شخصيت در لود، چې د پښتو ژبې لوستونکو ته يې زيات شمېر اثار پرېښي.
حبيب الله رفيع زیاته کړه (( وزیر محمد ګل خان مومند لومړنی سړی و چې د پښتو سیند یې ولیکه او هغه لار یې تعقیب کړه چې پښتو باید له دې لارې زده شي، دا یو ډېر ښه پښتون و په پښتو او پښتونولۍ مئین او پوه پښتون و، مرکې او جرګې به یې کولې ده یو بل کتاب هم لیکلی چې هغه لنډکۍ پښتو او پښتونواله ده.))
د سيمينار ګډونوال وايي، مومند له فرهنګي کارونو سربېره سياسي او نظامي چارو کې هم فعاله ونډه درلوده او تل يې د هېواد د ښېرازۍ لپاره کار کاوه.
