د بلخ مزارشریف ښار کې یو شمېر دیني عالمانو د جګړې له ښکېلو خواوو وغوښتل چې جګړه بس کړي او سوله دې وکړي.
د بلخ يو شمېر ديني عالمان وايي، په افغانستان کې د جګړې دوام، له بهرنيو استخباراتي کړيو سره مرسته کوي، چې هغوی خپلو موخو ته ورسېږي.
دوی چې په مزارشريف ښار کې راټول شوي وو له افغان حکومت او طالبانو څخه يې د روان جنګ د پای ته رسېدو غوښتنه کوله.
دوی وايي، په افغانستان کې د روان جنګ ټوله ګټه بهرنيو استخباراتي کړيو ته رسېږي؛ خو قربانيان يې افغانان دي.
د دغو ديني عالمانو په خبره په اسلامي ټولنو کې د تاوتريخوالي او بېګناه خلکو وژل د اسلام له نظره ناروا عمل دی.
په ورته مهال د بلخ ولايت مقام د روان جنګ په کابو کولو کې له ديني عالمانو د مرستې غوښتنه وکړه.
د بلخ ديني عالمانو د افغان جګړې له ښکېلو خواوو دا غوښتنه هم وکړه، چې تاوتريخوالی کم کړي او يوې تلپاتې سولې ته د رسېدو لپاره رښتيني ګامونه اوچت کړي.
