د افغان سولې لپاره د امریکا ځانګړی استازی زلمی خلیلزاد د مسکو له غونډې وروسته کابل ته راغلی.
ښاغلي خلیلزاد کابل کې له افغان سیاستوالو سره هم لیدلي دي.
له مسکو ــ کابل ته د امریکا د بهرنیو چارو د وزارت د ځانګړي استازي زلمي خلیلزاد ناڅاپي سفر ښایي د چین په پلازمېنه بیجنګ کې د بین الافغاني ناستې د ځنډېدو په تړاو وي.
ټاکل شوې وه چې سبا او بل سبا چین کې افغان حکومت او طالبان د سولې په اړه غونډه شوې وای؛ خو تیره ورځ مازدیګر مهال یو شمېر رسنیو د چینایي چارواکو له خولې تر نامالومې مودې د یادې ناستې د ځنډېدو خبر ورکړ.
مسکو کې د افغان سولې په تړاو د امریکا، روسیې، پاکستان او چین یوه ورځنۍ څلور اړخیزه ناسته پای ته ورسېده چې طالبانو او افغان حکومت په کې ګډون نه و کړی.
داسې انګېرنې هم دي چې ولسمشر غني غواړي چین کې بین الافغاني ناسته په افغانستان کې د ولسمشریزو ټاکنو د پایلو له اعلان وروسته وشي او ښایي همدا لامل وي چې دغه ناسته وځنډېده.
