د ننګرهار هسکه مېنه ولسوالۍ کې د تېرې ورځې پېښه په ملي او نړیواله کچه غندل شوې ده .
افغان ولسمشر، د ملګرو ملتونو سرمنشي، په کابل کې د امریکا سفیر، په کابل کې د ناټو قوماندانۍ اونورو افغان چارواکو او نړیوالو دغه برید غندلی دی.
یادو مشرانو او چارواکو یاد برید جنګي جنایت بللی او عاملینو ته یي د سزا غوښتنه کړې ده.
طالبانو هم یاده پېښه په اسلامۍ نړۍ کې فتنه او ستر جنایت بللی او عاملینو ته یې د جزا هیله څرګنده کړې ده.
په اسلام اباد کې مخکیني سفیر حضرت عمر زاخیلوال هم پر خپل ټویټر یاده پېښه غندلې، شهیدانو ته یې د جنت او ټپیانو ته د شفاء غوښتنه کړې ده.
زاخېلوال ویلي، د خدای په مرسته او د ملت په یووالي کولی شو، د ترهګرۍ له تباه کوونکې ناروغۍ نجات پیدا کړو.
د ننګرهار ولایتي چارواکو رسنیو ته ویلي، پېښه کې ۶۲ لمونځ کوونکي وژل شوي او ۱۰۰ نور ټپیان دي.
عیني شاهدانو دا هم ویلي، چې زیات شمېر لمونځ کوونکي د مسجد تر چت لاندې شوي وو او تر ډیره پرې کار روان و چې د پېښې قربانیان راوباسي.
