طالبان په دې لټه کې دي، چې انس حقاني بیرته خپلو ملګرو سره یو ځای ازاد شي.
پاکستان کې د امریکا او طآلبانو په لیدنه کې په دې اړه خبرې شوي چې څنګه کیدای شي انس حقاني له یو شمېر نورو طالبانو سره یوځای ازاد شي.
باور کېږي چې هغه د دوو امریکایي استادانو په بدل کې له زندان ازادیږي چې طالبانو نږدې دوه کاله وړاندې کابل کې تښتولي وو.
د حقاني شبکې د موسس جلاالدین حقاني کشر زوی انس حقاني په ۲۰۱۴ کال کې په خوست ولایت کې ونیول شو، د هغه په اړه داسې هم ویل کېږي چې په بحرین کې نیول شوی و او وروسته ملي امنیت ته سپارل شوی و.
د خلاصون لارې شورا مشر سید اکبر اغا داسې وویل (( زه فکر کوم حقاني به د خپلو نورو ملګرو سره یو ځای بندي وي او داسې ښکاري چې را خوشې شي.))
پاکستان ته د طآلبانو او امریکا پلاوي د ورتګ پرمهال خبرې شوي چې هغه به د دوو هغو استادانو په بدل کې ازادیږي چې طالبانو کابل کې له امریکایي پوهنتون څخه وتښتول او اوس ورسره بندیان دي.
پاکستان کې د افغان سفارت مالومات ښيي چې اسلام اباد کې د امریکا، طالبانو او پاکستان لوري وروستۍ خبرې د بندیانو په تبادلې وې.
پاکستان کې افغان سفیر شکر الله عاطف مشعل داسې وویل (( افغان حکومت خپل نظر څرګند کړی، هلته خبرې د بندیانو په ازادیدو وې، چې امریکا یې غوښتنه کوله، او موږ په ټوله کې یو نظر لرو دداسې مجلسونو چې د سولې په اړه وي چې افغان حکومت په کې په جریان کې نه وي او یا د افغان حکومت په همغږئ ترسره نه شي نه یوازې دا چې سولې ته به ګټه و نه رسوي بلکې تاوان به هم ور واړوي.))
طآلبانو یو کال وړاندې د دوو هغو امریکایي استادانو ویډو خپره کړه چې خبرداری په کې د د هغوی ناسم روغتیایي حالات وو.
طالبانو په خبرپاڼه کې هغه مهال ګواښ کړی و که امریکا د خپلو اتباعو په اړه فکر ونه کړي د ناسم روغتیایي وضیعت له امله به مړه شي.
حقاني شبکه د زیاتو پېچلو بریدونو وړتیا لري او باور کېږي چې حکومت هغه د فشار لپاره ساتلی چې د لویو بریدونو مخه پرې ډب کړي خو له دې سره سره حقاني شبکې خپل بریدونه نه دي بند کړي.
د بندیانو خوشې کېدل او تبادله د سولې د پروسې د تقویت لپاره مهم کار بلل کېږي چې ټینګار پرې زیات ده.
د ولسي جرګې غړی جاوید ساپی داسې وايي (( د دوو امریکايي استادانو د خوشې کیدو په بدل کې د انس حقاني خوشې کول د سولې نوی باب دی او موږ ته هیله راکوي.))
طآلبانو ټینګار پخوا دا و د امریکایي استادانو په بدل کې هم انس حقاني ازاد کړي او هم د تحریک طالبانو مرستیال ملا برادر چې اوس په قطر کې اوسي او د سولې د خبرو اترو لپاره د طالبانو استازولي کوي.
د انس حقاني د ازادېدو په اړه اندېښنې شته چې خوشې کېدل به یې د جګړې لوری کمزوری نه کړي.
د انس حقاني په اړه مالومات نه شته چې هغه په کوم زندان کې ساتل کېږي.
د ملي امنیت پخواني مالومات ښي چې هغه په خپلو جرمونو اعتراف کړی او په هغو ځایونو ګرځول شوی چې حقاني شبکې په کې بریدونه کړي دي.
