حکومت یوځل بیا په خپل د ټاکنو په ترسره کېدو ټینګار وکړ.
د ولسمشر ویاند صدیق صدیقي، چې رسنیو سره یې خبرې کولې سوله دوامداره پروسه وبلله او زیاته یې کړه، چې له دې اړخه د هېڅ یوې مهمې پرېکړې وخت کره نه دی.
صدیقي، د سولې له پروسې د ښې نتیجې هېله وښوده، خو په خبره یې چې له یادې پروسې کومه نتیجه نشته، نو ټاکنې به په خپل وخت ترسره کیږي.
که څه هم یو زیات شمېر خلک د ټاکنو په ترسره کېدو بې باوره او د سولې په هوکړه ټینګار کوي، خو د ولسمشر ویاند صدیق صدیقي بیا د سولې پروسه دوامداره او د پرېکړې وخت یې نامعلوم، خو د ټاکنو نیټه بیا دقیقه بولي.
له افغان حکومت سره له اتلس کلنو مرستو وروسته خلک له حکومت د ځان بساینې تمه لري، خو حکومت وایي د فقر په له منځه وړلو او ګڼو نورو برخو کې لاهم نړیوالو مرستو ته اړ دی.
حکومت داسې مهال نړیوالو مرستو ته د خپلو اړتیاو خبره کوي، چې تازه امریکا له افغان حکومت سره د ۱۲۵ میلیونه ډالرو د مرستې اعلان کړی.
دا پیسې به له جنګ او سیلاب ځپلو، داخلي بې ځایه شوو او له بهر راګرځېدونکو افغانانو سره د مرستې په توګه ولګول شي.
