د ملي امنیت ځانګړو ځواکونو په کابل ښار کې د حقاني شبکې دوه غړي ونیول.
ملي امنیت پر ارګ او ملي دفاع وزارت د راکټي بریدونو مخنیوی وکړ.
د ملي امنیت ځانګړو ځواکونو په یو لړ خاصو عملیاتو کې د حقاني شبکې دوه غړي له سپکو او درنو وسلو سره نیولي دي.
د ملي امنیت خبرپاڼه کې د نیول شویو بریدګرو نومونه جمشید مشهور په صابر او رحمت الله ښودل شوي دي.
خبرپاڼه لیکي چې بریدګرو غوښتل د هېواد خپلواکۍ سلمې کلیزې مراسمو پرمهال بریدونه وکړي، چې د خاصو ځواکونو لخوا نن سهار نهه بجې د شپاړسمې حوزې اړوند قلعه زمان خان سیمه کې ونیول شول.
نیول شویو بریدګرو سره یو پایه هوان او شپاړس د هاوان مرمۍ، ۴۵ کیلو ګرامه چاودېدونکي توکې، ۱۲ حلقې مقناطیسي ماینونه، کلاشینکوف، د ځانمرګو واسکټونو د جوړولو وسایل او ځینې نور مواد نیول شوي دي.
