دافغانستان ملي امنیت شورا هم په کابل د تېرې شپې پېښه په کلکه غندلې ده .
له ملي منیت شورا په خپره شوې خبرپاڼه کې دغه برید د انسانیت او اسلامیت خلاف برید بلل شوی دی.
ولسمشر اشرف غني، اجراییه رییس عبدالله عبدالله، اروپايي ټولنې او کابل کې د امریکا سفارت دغه برید غندلی دی.
د کابل تېرې شپې په چاودنه کې ۶۳ کسان وژل شوي او ۱۸۲ نور ټپيان دي.
چادونه تېره شپه د کابل شپږمې ناحیې اړوند د شهر دوبۍ په نامه د ودونو په تالار کې شوې او د واده ګډونوالو ته پکې مرګ ژوبله اوښتې ده.
د کورنیو چارو وزارت ویاند نصرت رحیمي وایي تراوسه د ۶۳ کسانو وژل کېدل او ۱۸۲ نورو ټپي کېدل تایید شوي دي.
عیني شاهدان بیا د وژل شوو او ټپيانو شمېر له دې هم پورته بولي.
عیني شاهدان وایي برید شاخوا لس نیمې بجې وشو او تراوسه د برید څرنګوالي په تړاو هم مالومات نه لري.
یوه عیني شاهد ویلي، د سړو ځای کې نږدې هېڅ کس هم سالم نه دی پاتې او په وینا یې ټول سړي یا وژل شوي او یا ټپیان دي.
په دغه سالون کې شاوخوا زر کسان راټول شوي وو.
طالبانو په دغه پېښه کې خپل لاس لرل رد کړي دي او برید یې وحشیانه بللی.
طالبانو ویلي، د کابل ښار په یو هوټل کې په ملکي خلکو چاودنه او هغوی ته تلفات اړول په کلکه غندي، او په وینا یې دغه ډول وحشیانه قصدې وژنې او ښځې او ماشومان په نښه کول هیڅ ډول توجیه او جواز نه لري.
تر اوسه کومې بلې ډلې د دغه برید مسؤلیت نه دی منلی، خو د کابل دې برخه کې تر ډېره هزاره وګړي مېشت دي.
نن سهار هم دغه هوټل ته څېرمه د نښلېدونکي ماین چاودنه شوې خو مرګ ژوبله نه لري.
