ولسي جرګې د رایو په اکثریت د نیمايي کال بودجه تصویب کړه.
ولسي جرګې د نیمايي کال بودجه کې د سولې وزارت لپاره وړاندیز شوې بودجه و نه منله او هغه بودجوي واحدونه یې هم له بودجې لرې کړل چې حکومت په خپل سر جوړ کړي وو.
ولسي جرګې د ځینو ملاحظاتو او بدلونونو لپاره لومړي ځل باندې بودجه رد کړې وه او ماليې وزارت یې ځینې غوښتنې بودجه کې ومنلې.
په نیمايي کال بودجه کې دولسي جرګې او حکومت ترمنځ دولس اختلافي موارد و چې په ځانګړي کمیسیون کې له مالیې وزارت سره له ګڼو بحثونو وروسته پر یولسو یې سره موافقه وکړه ، خو د سولې وزارت سربیره یو شمیر هغه بودجوي واحدونه وکیلانو ونه منل او رد یې کړل چې تازه رامنځ ته شوي .
د نیمايي کال د بودجې په تړاو عمومي تالار ته د مالي اوبودجې کمیسیون له مالوماتو وروسته دغه بودجه رایې اچوونې ته وړاندې شوه چې وکیلانو د رایو په اکثریت تصویب کړه .
په ورته وخت کې د ولسي جرګې او مشرانو جرګې له لوري یو افغان سوداګر ته ستاینلیک او مډالونه هم ورکړل شول، دغه افغان سوداګر په انګلستان هیواد کې د پارلمانونو د نړیوال جام پر مهال افغان پارلمان لوبډلې ته اسانتیاوې برابرې کړې وې .
