افغانستان کې د ماشومانو وضعیت ورځ تر بلې له لویو خنډونو سره مخ کیدونکی دی.
د دری میلیونه افغانو ماشومانو حقوق عملا تر پښو لاندې کیږي.
د ماشومانو د حقونو د ساتنې لپاره اوس تازه قانون هم واضح شوی خو د کار او ټولنیزو چارو وزارت وایي د قانون تطبیق به اسانه نه وي.
دا قانون په اته فصلونو او شاوخوا سلو مادو کې ترتیب شوی چې ټولنې، کورنۍ او دولت کې د ماشومانو حقوق په ګوته کوي.
کار ټولنیزو چارو وزارت د ولسمشر لخوا دماشومانو د ملاتړ یو نوی قانون په تقنیني فرمان منظور کړی چې د ماشومانو یادې ستونزو ګراف راټیټ کړي.
د کار او ټولنیزو چارو وزارت ویاند عبدالفتاح احمدزی که څه هم د دې قانون د پلي کولو خبره کوي خو تر څنګ یې اندیښمن هم دی چې تطبیق به یې ستونزې ولري.
کابل چې باید د ماشومانو د ښه ژوند بیلګه وي خو برعکس دلته ډیری ماشومان د خپلو کورونو لپاره په لارو او کوڅو کې د وړو شیانو خرڅلاو کوي او کورنۍ ته د ورځې ډوډۍ برابروي.
اوس چې د ماشومانو د ملاتړ دا نوی قانون منظور شوی د ماشومانو حقوق یې کورنۍ، ټولنه او دولت کې ټاکلي او تر پښو لاندې کوونکو ته یې جزاوې ټاکل شوي دي.
درویشتمه ماده ((د ماشوم په وړاندې د هر ډول جسمي رواني او اذیت کړنې منع دي، هیڅ شخص نشي کولی د ماشوم د روحي، جسمي یا رواني ځورونې او اذیت لامل شي، مرتکب د قانون له حکمونو سره سم تر عدلي تعقیب لاندې نیول کیږي.))
انګیرنې دا دي چې د دي قانون په پلې کولو به د افغان ماشومانو په ژوند کې مثبت بدلون راشي خو تطبیق کول به یې د ډیرو نورو قانونو په شان له سترو ستونزو سره مخ وي.
