د سې شنبې په ورځ مسکو کې د طالبانو او افغان سیاستوالو دوه ورځینۍ غونډه پیل شوه.
طالبانو په ناسته کې ټینګار وکړ چې د قدرت انحصار نه غواړي او د افغانستان اساسي قانون د باور وړ نه دی.
طالبان وایي اجنډا یې بهرنۍ نه ده او په افغانستان کې د یو داسې نظام جوړېدل غواړي چې د ټولو حقوق په کې خوندي وي.
له دې سره افغان سیاستوالو په بین الافغاني خبرو ټینګار وکړ، خو خبرداری یې دا و چې استبدادي او میراثي حکومتونو وخت پای ته رسېدلی دی.
د افغان سیاستوالو په وینا نظام د خلکو په وینو جوړ شوی، خو د اصلاح لپاره د چا مخنیوی نه کوي.
مخکیني ولسمشر حامد کرزي په مسکو کې د افغان سولې په تړاو ناستې په وینا کې ویلي، دوی یو خپلواک او د بهرنیو له حضور او مداخلې پرته افغانستان غواړي، داسې افغانستان چې د
کرزي په خبره له نړۍ او ګاونډیانو سره هم ښې اړیکې ولري.
کرزي په دې ناسته کې یو ځل بیا طالبانو ته د ورونو خطاب کړی او هیله یې څرګنده کړې چې د مسکو غونډه سولې ته د رسېدو لپاره مرسته وکړي.
هغه له امریکایانو سره د طالبانو د روانو خبرو هرکلی هم کړی.
په همدې غونډه کې عطاء محمد نور ویلي، که سوله د موقت حکومت پر جوړېدو راځي باید ورته لبیک وویل شي، څو طالبان هم په واک کې شریک او خپله ونډه واخلي.
د ولسمشر غبرګون
د مسکو غونډې ګډونوال د هېڅ پرېکړې حق نه لري.
ولسمشر محمد اشرف غني وایي، د مسکو ناستې ګډونوال د کومې پرېکړې واک نه لري او په وینا یې هغه یوه خیالي غونډه ده چې پرېکړه یې پر هېڅ افغان نه شي ورتپلی.
غني وایي، د سولې لپاره له واک او ان له خپله ژونده تېر دی، خو لومړی باید پوه شي چې د کومو ارزښتونو بدل کې له دې هر څه تېرېږي.
هغه وایي، په دې کې هڅ شک نشته چې طالبان د اوسني حکومت او نظام کمزورتيا او له منځه وړل غواړي، خو دی به هېڅ کله هم د افغانانو پر برخلیک معامله ونکړي.
ولسمشر زیاته کړه چې که طالبان ځان مطرح بولي نو را دې شي او په ټاکنو کې دې برخه واخلي، او بیا به ثابته شي چې څومره افغانان دوی غواړي.
