د طالبانو او امریکایانو تر منځ د شويو خبرو جزیات کرار کرار روښانه کیږي.
طالبان وايي، له سولې کولو وروسته د قدرت انحصار نه بلکې له ټولو قومونو سره
ګډ حکومت جوړول غواړي.
د قطر دفتر سیاسي مشر عباس ستانکزی وايي، له امریکایانو سره یې په دې توافق کړی چې هغوی به افغانستان پریږدي او طالبان به بیا هیڅ کله امریکا ته خطر نه پېښوي.
د چین سفیر بیا له شمشاد سره په خبرو کې بیا ډاډ ښودلی چې افغان سوله د سیمې او ګآونډیو هېوادونو په ګټه ده.
د قطر دفتر استازی شېر محمد عباس ستانکزي د شویو خبرو او د سولې په صورت کې د طالبانو په دریځ مفصلې خبرې کړې دي.
شېر محمد عباس ستانکزی وایي، له امریکایانو سره په دوه مهمو موضوعاتو په بشپړه توګه توافق ته نیږدې شوي خو د افغان حکومت سره مخامخ خبرو او د اوربند موضوع د متفق شويو موضوعاتو د هوکړې مخه ونیوله.
په بشپړه توګه د امریکایانو وتل او په افغانستان کې د هیڅ نظامي اډې نه موجودیت د طالبانو غوښتنه وه خو د امریکا لویه غوښتنه بیا دا وه چې افغانستان او طالبان به بیا هیڅکله امریکا ته خطر نه پېښوي.
د سیمې هېوادونه هم له روانو خبرو راضي ښکاري.
پاکستان د سولې په روانو هڅو کې په همکارۍ تورن دی، روسیه او ایران بیا په ظاهر کې دې پروسې ملاتړي ښکاري خو چین بیا کېدونکې سوله د ټولې سیمې په ګټه ګڼي.
په افغانستان کې د چین سفیر داسې ویلي (( افغانستان د اسیا زړه دی او زړه ډیر مهم وي، که په زړه کې ستونزه وي نور وجود هم ترې متضرر کیږي. د سولې روانې خبرې کې پایله ورکړي او د افغانستان په ګډون یې د سیمې هیوادونو او ګاونډیو ته هم ګټه رسیږي ځکه، افغانستان به له جګړې ازاد شي او ګاونډي هیوادونه به هم ځان امن احساس کړي. او نورو هیوادونو ته به یې اقتصادي ګټه هم ورسیږي))
افغانستان کې بیا د شویو او کېدونکو خبرو له مبهموالي اندېښنه لري او ټینګار کوي چې هغه مسایل چې په راتلونکې کې ستونزې پېښولی شي اوس باید حل شي.
طالبان چې له امریکایانو سره توافق ته ورسیږي له هغې وروسته په کور دننه د شته اختلافونو د حل لپاره مذاکرې ته داخلیږي.
د را روانې میاشتې په ورستیو کې به له توافق وروسته د طالبانو او امریکایانو تر منځ اوربند او له افغان حکومت او دلته د شته سیاسي احزابو سره د مخامخ خبرې د بحث وړ موضوعات وي.
